Төлем

Cactus дүкеніндегі тапсырыс онлайн төленеді — банк картасымен, Kaspi немесе PayPal арқылы. Төменде әр тәсілмен қалай төлеу керектігі, төлемді алушы ретінде кім көрсетілетіні, төлем өтпесе не істеу керектігі және ақша қалай қайтарылатыны жазылған.

Немен төлеуге болады

• Visa немесе Mastercard картасымен — онлайн, TipTopPay қорғалған терезесінде.
• Kaspi арқылы — тапсырыс сомасына шот Kaspi.kz қосымшасына келеді, оны сол жерде растайсыз.
• PayPal арқылы — шетелден төлегенде ыңғайлы; PayPal соманы АҚШ долларымен есептен шығарады.
• Қолма-қол ақша қабылданбайды: жеткізу кезінде курьерге де, өзі алып кеткенде дүкенде де төлеуге болмайды.
• Бағалар мен жалпы сома теңгемен (₸) көрсетілген.

Қашан төлеу керек

Төлем — рәсімдеудің соңғы қадамы: тәсілді таңдап, «Жалғастыру» батырмасын басыңыз (PayPal таңдалса, бұл батырманың орнына PayPal-дың өз батырмалары шығады).

Төлем сомасына жеңілдіктер мен промокодтар ескерілген тауарлар және жеткізу кіреді; жалпы соманы төлемді растамас бұрын көресіз.

Төлем сервисі ақшаның есептен шығарылғанын растағанда тапсырыс төленген болып саналады. Оған дейін шарт жасалмайды және тапсырыс жиналмайды. Төлем өткенде сайт тапсырыстың қабылданғанын хабарлайды; мәліметтерді нақтылау үшін қызметкеріміз қоңырау шалуы мүмкін.

Төлеуге рәсімдеген сәттен бастап бір тәулік беріледі. Жеке кабинетке кірген болсаңыз, «Төлем күтілуде» немесе «Қате» күйіндегі тапсырысты («Төлем күтілуде» күйіндегі Kaspi тапсырысынан басқа) «Менің тапсырыстарым» бөлімінде картамен төлеуге болады — «Төлеу» батырмасы арқылы. Бір тәулік ішінде төленбеген тапсырыс автоматты түрде «Болдырылмады» күйіне ауысады (бір ерекшелігі бар — ол төменде, Kaspi туралы бөлімде). Одан кейін төлем бәрібір өтсе, тапсырысты орындаймыз, ал таңдалған уақытқа үлгеру мүмкін болмаса, сізбен жаңа уақытты келісеміз, келісе алмасақ, ақшаны қайтарамыз. Рәсімдеу кезінде жіберілген Kaspi шоты тапсырыс «Болдырылмады» күйіне ауысқаннан кейін де қосымшада қалуы мүмкін, ал оны төлесеңіз, тапсырыс қайтадан орындалуға алынады. Сондықтан тапсырысты қайта рәсімдеп қойсаңыз, ескі шотты төлемеңіз — әйтпесе екеуі де төленіп кетеді.

TipTopPay арқылы картамен

«Жалғастыру» батырмасын басқаннан кейін TipTopPay терезесі ашылады. Карта нөмірін, оның жарамдылық мерзімін (ай мен жылды) және картаның артқы бетіндегі үш цифрды (CVV2/CVC2) енгізіңіз.

Банк төлемді 3-D Secure арқылы растауды сұрауы мүмкін: әдетте бұл SMS арқылы келетін бір реттік код немесе банк қосымшасындағы батырма. Код келмесе, картаны шығарған банк қана көмектесе алады.

Банк төлемді қабылдамаса немесе төлем терезесі жабылып қалса, себет пен енгізген деректеріңіз рәсімдеу бетінде қалады — «Жалғастыру» батырмасын тағы бір рет басыңыз немесе басқа карта қолданыңыз.

Kaspi арқылы

Kaspi-ді таңдап, «Жалғастыру» батырмасын басыңыз. Шот Kaspi.kz қосымшасына «Тапсырыс берушінің телефоны» өрісіндегі нөмірге келеді; кабинетке кірген болсаңыз, бұл — профиліңіздегі нөмір.

Нөмір қазақстандық (+7) және Kaspi-ге қосылған болуы керек, әйтпесе шот жіберілмейді. Нөмір жарамаса: кабинетке кірмеген болсаңыз, Kaspi-дегі өз нөміріңізді жазыңыз; кірген болсаңыз, нөмір профильден алынады және рәсімдеу кезінде өзгертілмейді, сондықтан басқа төлем тәсілін таңдаңыз.

Қосымшаны ашып, шотты растаңыз. Төлем туралы хабар бізге бірден емес, әдетте бірнеше минуттан соң жетеді; тапсырыс беті өзі жаңарады.

Шот төлемді күтіп тұрғанда тапсырыста «Төлеу» батырмасы болмайды — екі рет төлеп қоймас үшін. Шоттан бас тартсаңыз немесе Kaspi оның төленбегенін хабарласа, тапсырыс «Қате» күйіне ауысады, содан кейін оны картамен төлеуге болады.

Kaspi уақытында жауап бермесе, сайт шот жіберілмегенін, бірақ тапсырыс сақталғанын хабарлап, картамен төлеу бетін ашады. Осыдан кейін қосымшада шот пайда болса, оны төлемеңіз — мұндай төлем тапсырыспен байланыспайды. Мұндай тапсырыстың «Менің тапсырыстарым» бөлімінде «Төлеу» батырмасы болмайды және ол автоматты түрде «Болдырылмады» күйіне ауыспайды, сондықтан картамен төлеу бетін төлемей жауып қойсаңыз немесе тапсырыс енді керек болмаса, қоңырау шалыңыз (байланыс деректері төменде). Ал банк картамен төлемді қабылдамаса, тапсырыс «Қате» күйіне ауысады да, одан әрі оған жоғарыда жазылған жалпы ережелер қолданылады.

PayPal арқылы

PayPal-ды таңдаңыз — «Жалғастыру» батырмасының орнына PayPal батырмалары шығады. PayPal аккаунтыңызға кіріп, төлемді растаңыз.

Олардың арасында банк картасымен төлеу батырмасы болуы мүмкін: мұндай төлемді де PayPal өз ережелерімен өткізеді. Бұл батырманы ұсыну-ұсынбауды PayPal елге қарай өзі шешеді.

PayPal соманы АҚШ долларымен есептен шығарады. Ол теңгеден дүкен бағамы бойынша есептеледі, ал доллардағы нақты соманы PayPal сіз төлемді растағанға дейін көрсетеді. PayPal шотыңыз не картаңыз басқа валютада болса, одан әрі айырбастауды PayPal немесе банкіңіз жасайды.

Төлемді алушы ретінде кім көрсетіледі

Тапсырысты Cactus қабылдайды және орындайды. Ол үшін ақшаны сатушының төлем агенті — сатушымен жасалған шарт бойынша оның пайдасына төлем қабылдайтын ұйым алады.

Сондықтан төлем терезесінде, Kaspi шотында, банк үзінді көшірмесінде және чекте ақшаны алушы ретінде Cactus емес, төлем агенті (немесе ол төлем қабылдайтын сервис) көрсетілуі мүмкін. Бұл қалыпты жағдай: тапсырысты Cactus қабылдайды. Тапсырыс нөмірін сайт төлем мақсатында көрсетіп, төлем сервисіне береді.

Бұл қаншалықты қауіпсіз

Карта деректерін біздің сайтқа емес, TipTopPay терезесіне енгізесіз: біз оларды алмаймыз және сақтамаймыз. TipTopPay оларды шифрланған күйде береді, PCI DSS талаптарына және Visa мен Mastercard ережелеріне сәйкес келеді.

Kaspi шотын Kaspi қосымшасының өзінде растайсыз, оған тек сіз ғана кіре аласыз.

PayPal арқылы төлегенде логин, құпиясөз және карта деректері PayPal жағында енгізіледі — бізге жетпейді.

Төлем өтпей қалса

Банк картамен төлемді көбінесе мына себептердің бірімен қабылдамайды:

• картада интернеттегі сатып алулар өшірулі: оларды банк қосымшасында немесе банкке қоңырау шалып қосуға болады;
• шотта ақша жетпейді немесе сатып алу лимиті таусылған;
• карта нөмірінде, жарамдылық мерзімінде немесе кодында қате жіберілген;
• картаның жарамдылық мерзімі бітіп қалған;
• картаны шығарған банк басқа елдерге төлем жасауды шектейді: мұндай шектеу Қазақстаннан тыс банктердің карталарында кездеседі.

Қабылданбаған төлем төлем болып саналмайды, тапсырыс жиналмайды. Банкпен мәселе шешілгеннен кейін рәсімдеу бетінде «Жалғастыру» батырмасын тағы бір рет басыңыз немесе басқа төлем тәсілін таңдаңыз; кабинетке кірген болсаңыз, тапсырысты «Менің тапсырыстарым» бөліміндегі «Төлеу» батырмасымен де, ол қолжетімді болып тұрғанда, картамен төлеуге болады.

Ақша есептен шығарылған, бірақ сайт қате көрсеткен болса (мысалы, PayPal төлемді растамаса), қайта төлемеңіз: алдымен қоңырау шалыңыз (байланыс деректері төменде), төлемді тексереміз.

Ақшаны қайтару

• Ақша тапсырыс қалай төленсе, солай қайтарылады: картамен төлесеңіз — сол картаға; Kaspi арқылы төлесеңіз — төлем өткен Kaspi-ге; PayPal арқылы төлесеңіз (PayPal блогындағы картамен де) — PayPal арқылы, ақша қайдан алынса, сонда: PayPal шотына немесе картаға. Қолма-қол ақшамен қайтарылмайды.
• Тапсырыс сізге немесе алушыға берілгенге дейін одан бас тартуға болады. Флорист жинауды әлі бастамаса, бүкіл сома қайтарылады; жинау басталса немесе тапсырыс курьерде болса, тауардың және флорист жұмысының құнын ұстап қалуға құқылымыз.
• Ақшаны қайтаруды сұраған күннен бастап, ал тапсырысты өзіміз орындай алмасақ — бұл туралы сізге хабарлаған күннен бастап 10 күнтізбелік күннен кешіктірмей кері жібереміз. Одан кейін оның сізге қанша уақытта жететіні банкке немесе төлем сервисіне байланысты.
• Картамен немесе Kaspi арқылы төленген ақша теңгемен қайтарылады. Карта шоты басқа валютада болса, банкіңіз соманы өз бағамы бойынша айырбастайды, сондықтан карта валютасында ол есептен шығарылған сомадан сәл өзгеше болуы мүмкін.
• PayPal арқылы жасалған төлем АҚШ долларымен — есептен шығарылған валютада қайтарылады.

Тапсырысты қашан қайтаруға немесе айырбастауға болады

Сатушы